पर्वत। “सभ्य संस्कृति र प्रविधी सम्पन्न स्वास्थ्य, शान्त र समुन्नत समाजको निर्माण” भन्ने नाराका साथ राष्ट्रिय जागरण युवा समाज फलेवास नगरपालिका–५, खानीगाउँद्वारा आयोजित शैक्षिक, सांस्कृतिक तथा खेलकुद मेला शुरु भएको छ ।
युवा समाजको प्राङ्गणमा सुरु भएको मेलाको उद्घाटन फलेवास नगरपालिकाका नगरप्रमुख गंगाधर तिवारीले गर्नुभएको हो । उद्घाटन कार्यक्रममा बोल्दै नगरप्रमुख तिवारीले युवाहरूलाई सामाजिक, सांस्कृतिक तथा खेलकुद गतिविधिमार्फत सकारात्मक दिशामा अघि बढाउन यस्ता कार्यक्रमले महत्वपूर्ण भूमिका खेल्ने बताउनुभयो ।
कार्यक्रममा फलेवास नगरपालिकाकी उपप्रमुख शोभाकुमारी क्षेत्री, वडा नम्बर ५ का वडा अध्यक्ष नारायण लामिछाने, कार्यपालिका सदस्य नेत्र बिक लगायतले शुभकामना मन्तव्य व्यक्त गर्नुभएको थियो ।
युवा समाजका अध्यक्ष लकास सुबेदीको अध्यक्षतामा सम्पन्न उद्घाटन कार्यक्रमको सञ्चालन सचिव विक्रम जिसीले गर्नुभएको थियो ।
मेलाअन्तर्गत हाजिरीजवाफ, खुल्ला भलिबल, स्वोलो बाइक रेस, कुर्सी दौड, छेलो फाल प्रतियोगिता लगायत विभिन्न प्रतियोगिता सञ्चालन गरिने आयोजकले जनाएको छ । प्रतियोगिताका विजेतालाई नगद पुरस्कार, ट्रफी, मेडल तथा प्रमाणपत्र प्रदान गरिनेछ ।
