पर्वतको महाशिला गाउँपालिकाले पैयूँ राज्य स्थापनादेखि हालसम्मको आफ्नो ईतिहास अब सुरक्षित गरेको छ । ६ वटै वडाका ज्येष्ठ नागरिकहरूसँग अडियो रेकर्ड गर्दै पुरानो ईतिहासको जनश्रुतिलाई सुरक्षित, संरक्षित र पुस्तान्तरण हुने गरि व्यवस्थित गरेको हो ।
फलामखानिको बस्ति सुरूवात र फलामखानि उत्खनन्, लुँखुको गौंडाको कहानि, बालारानिका कथाहरू, पैयू राज्य र पैयूँकोट लगायत हरेक वडाका पुराना कहानिहरू ज्येष्ठ नागरिकका मुखबाटै सुन्दै रेकर्ड गरिएको हो ।
“ईतिहासका कुरा मेट्न दिनुहुँदैन, तिनिहरूलाई कुनै न कुनै रूपमा जोगाइराख्नुपर्छ भनेर यो कार्यक्रम गरिएको हो” प्रमुख प्रशासकिय अधिकृत देवेन्द्र पाण्डेयले बताए । करिब ७ घण्टा लामो अडियो रेकर्डले पुरानो ईतिहास नयाँ पुस्तालाई सुनाउन काम लाग्नेमा उनी विश्वश्त देखिए ।
यसैगरि गाउँपालिका अध्यक्षले बुढाबुढिसँग भएको पुरानो दन्त्य र लोक प्रसंगहरू नयाँ पुस्तामा सर्ने क्रम न्यून भएकाले यस्तो कार्यक्रम गरिएको र यो अझै पूर्ण नदेखिए थप यस्ता कार्यक्रम जोडिने बताए । “ईतिहास पुस्तासँगै मेटिन दिनु हुँदैन” उनले बताए ।
गाउँपालिकाले चालू आर्थिक वर्षका कार्यक्रममा यस्ता ईतिहासका कुरा जगेर्ना गर्ने, संस्कृति पुस्तान्तरणका लागि अभ्यास गर्ने जस्ता विषयलाई समावेश गरेको छ ।
