पर्वत — महाशिला गाउँपालिकालाई पूर्ण खोप सुनिश्चितता तथा दिगोपना पालिका घोषणा गरिएको छ।
खोप उमेर समूहका सबै बालबालिकाले निर्धारित सम्पूर्ण खोपको मात्रा पूरा गरेको सुनिश्चित भएपछि बिहीबार आयोजित एक कार्यक्रमबीच गाउँपालिकालाई औपचारिक रूपमा पूर्ण खोप सुनिश्चितता तथा दिगोपना पालिका घोषणा गरिएको हो।
कार्यक्रमका प्रमुख अतिथि जिल्ला समन्वय समिति पर्वतका प्रमुख विष्णुराम वि.क.ले पूर्ण खोप सुनिश्चितता घोषणा स्वास्थ्य क्षेत्रको महत्वपूर्ण उपलब्धि भएको बताउनुभयो। उहाँले आगामी दिनमा पनि खोप कार्यक्रमलाई प्रभावकारी रूपमा निरन्तरता दिन आग्रह गर्नुभयो।
कार्यक्रममा बोल्दै महाशिला गाउँपालिकाका अध्यक्ष इश्वरी प्रसाद भुसालले गाउँपालिकाले स्वास्थ्य क्षेत्रलाई उच्च प्राथमिकतामा राखेर काम गरिरहेको बताउनुभयो। उहाँले सबै पक्षको सहकार्य र समन्वयबाट गाउँपालिकालाई पूर्ण खोप सुनिश्चितता तथा दिगोपना पालिका घोषणा गर्न सफल भएको उल्लेख गर्दै यस अभियानमा सहयोग गर्ने सबैप्रति धन्यवाद व्यक्त गर्नुभयो।
कार्यक्रममा गाउँपालिका उपाध्यक्ष धनसुवा वि.क., प्रदेश जनस्वास्थ्य कार्यालय पर्वतका प्रमुख बद्रीराज आचार्य, महाशिला गाउँपालिका वडा नं. ५ का अध्यक्ष चन्द्रबहादुर मल्ल, स्वास्थ्य शाखाका तर्फबाट राम दिनेश राउत तथा बालारानी माध्यमिक विद्यालयका प्रधानाध्यापक केशवप्रसाद अधिकारीलगायतले मन्तव्य राख्नुभएको थियो।
गाउँपालिका अध्यक्ष इश्वरी प्रसाद भुसालको अध्यक्षतामा सम्पन्न कार्यक्रमको स्वागत तथा प्रतिवेदन स्वास्थ्य शाखा प्रमुख नरबहादुर बरालले प्रस्तुत गर्नुभएको थियो भने सञ्चालन कृष्ण रानाले गर्नुभएको थियो।
साथै कार्यक्रममा उत्कृष्ट स्वास्थ्य संस्था,स्वास्थ्यकर्मी र स्वयंसेविकाहरुलाइ सम्मान गरिएको थियो ।
