पर्वत — महाशिला गाउँपालिका वडा नं. १ अर्गाउँदीमा वैशाख पूर्णिमाको अवसर पारेर मेला सुरु भएको छ। श्री म्हण्डली तमु युवा परिवारको आयोजना तथा बाज्यु म्हण्डली संरक्षण तथा संवर्द्धन समितिको सह–आयोजनामा हिजोदेखि मेला सञ्चालनमा आएको हो।
स्थानीय पर्यटन प्रवर्द्धन र खेलकुद विकासलाई टेवा पुर्याउने उद्देश्यले मेला आयोजना गरिएको तमु युवा परिवारका अध्यक्ष दिनेश गुरुङले जानकारी दिनुभयो।
मेलामा भलिबल प्रतियोगिता, राष्ट्रिय तथा स्थानीय कलाकारहरूको सांगीतिक प्रस्तुति तथा बाज्यु म्हण्डली थान निर्माणमा सहयोग गर्ने व्यक्तिहरूलाई सम्मान गर्ने कार्यक्रम रहेको छ । भलिबल प्रतियोगितामा १० टिमको सहभागिता रहेको आयोजकले जनाएको छ।
वैशाख १८ गतेसम्म सञ्चालन हुने मेलाको समापन अवसरमा लोकदोहोरी गायक कुलेन्द्र विश्वकर्मा, धनबहादुर गुरुङ, निनल गुरुङ, दीपक गुरुङ तथा पप गायक अमित गुरुङलगायतका कलाकारहरूको विशेष प्रस्तुति रहने कार्यक्रम तय गरिएको छ।
यसैबीच, बाज्यु म्हण्डली संरक्षण तथा संवर्द्धन समितिका अध्यक्ष लेखकाजी गुरुङले मेलामा सहभागी भई कार्यक्रमलाई भव्य रूपमा सफल बनाउन सबैलाई अनुरोध गर्नुभएको छ।
[sidebar name="After post"]
