नेपाल कम्युनिष्ट पार्टी (एमाले)को जनवर्गीय संगठन राष्ट्रिय जनसांस्कृतिक महासंघ नेपाल पर्वत जिल्ला कमिटिको छैटौँ अधिवेशन सम्पन्न भएको छ । मंगलबार सम्पन्न अधिवेशनबाट दिपक गदालको अध्यक्षतामा सर्वसम्मत समिति गठन भएको छ।
अधिवेशनबाट उपाध्यक्षमा शिव पौडेल,सीता परियार सचिवमा समुन्द्र शर्मा, कोषाध्यक्षमा बिमला परियार, सहसचिवमा कृष्ण कडेल र सह- कोषाध्यक्षमा मन्जु बिश्वकर्मा चयन भएका छन् । यसैगरी कार्यसमिति सदस्यहरुमा राधिका रोका क्षेत्री,पदमपाणी पौडेल,कमला लामिछाने,हरिमाया पुन,सरिता परियार,हेमा जिशी,गोपाल प्रसाद शर्मा,रेणु पुन रहेका छन् ।
अधिवेशनबाट दोस्रो कार्यकालका लागि अध्यक्ष बनेका दिपक गदालले अबका दिनहरुमा महासंघको कमिटी ७ वटै स्थानीय तहहरुमा निर्माण गरि सामाजिक सांस्कृतिक जागरणका अभियानलाई पार्टी र जनतासँग जोड्ने गरि अगाडि बढ्ने प्रतिबद्धता व्यक्त गरे । साथै उनले पार्टी निर्माण तथा सुदृढीकरण, निर्वाचन लगायतका अभियानमा विगतदेखि नै जनसांस्कृतिक महासंघको योगदान महत्त्वपूर्ण रहेको भन्दै संगठन र पार्टीसंगको समन्वय संतोषजनक हुन नसकेको बताए ।
अधिवेशन उद्घाटन सत्रमा शुभकामना व्यक्त गर्दै नेकपा एमाले गण्डकी प्रदेश अध्यक्ष एवम् कार्यक्रमका प्रमुख अतिथि नवराज शर्माले जिल्लाको गाउँकन्दरा र शहरमा रहेका सबै प्रतिभा र कलाहरुलाई एकत्रित गर्दै पार्टीसँग जोडेर पार्टीले गरेका राम्रा कामलाई जनसांकृतिक महासंघको माध्यमबाट जनतामा लैजानुपर्ने बताए ।
नेकपा एमाले पर्वतका अध्यक्ष गोविन्द पहाडीले विगतमा महासंघको अभियान जिल्लामा केही समय सुस्त हुँदै निष्क्रिय नै रहेको भन्दै अब बनेको कमिटिले गाउँगाउँमा गएर पार्टी संगठनलाई चिनाउने विश्वास व्यक्त गरे । पहाडीले पार्टीका अभियान लिएर जनताको माझमा जान र जनतासँग जोडिनको लागि जनसँस्कृतिक महासंघ एक अब्बल र सक्रिय पार्टी संगठन रहेको बताउदै कलाकार उत्पादनमा पनि ध्यान दिन संगठनलाई आग्रह गरे ।
संगठनका अध्यक्ष दिपक गदालको अध्यक्षतामा सम्पन्न भएको कार्यक्रममा स्वागत कृष्ण कडेलले र संचालन प्रेस चौतारी पर्वतका निबर्तमान अध्यक्ष कृष्ण अखेलीले गरेका थिए ।
